خسيت

خسيت لعن أبو جدك ؛ خسيت والغلط ينعاب
خسيت واقلب وجهك ؛ ولا كلمه ؛ولاجابه




خسيت والتزم حدك ؛ تراها ضاعت الاداب
انا لاطاشت جنوني ؛ يعرف الجاهل ادابه



شو المغزا من الكلمه بلا داعي بلا الاسباب
وكلام الكذب والتجريح ؛ قول لي وش اسبابه



انا الشرهه علي اني فتحت لخافقي كم باب
ولكن مثل ماجيت !!! ترا كبر الجمل بابه



خذ نفسك معك برا ؛ ثم انقلع بدون إياب
فمان الله ؛ والا اقول :: فمان ابليس واصحابه



تحسب اني على فرقاك ابندم واغرق الاهداب
انا مبسوطهـ يوم اني ؛؛ طردت الشوم وغرابه



انا ما اعاشر الخاين ولا اسمع هرجة الكذاب
ومثلك قيمته عندي تحت الزيرو حسابه



وانا مانيب حرف الجر ؛؛ تجره على الاعراب
انا حرف(ن) جزم نفسه ؛ ومثلي يصعب اعرابه



تشوم النفس عن زينك عقب ماطاح فيها ذباب
وانا حر(ه) وبنت الحر؛؛ تركت الزين وذبابه




انا شيخه وبنت الشيخ ؛ بذكره تنعم الانساب
اليا قام العرب كلاً ؛؛ يراجع دفتر انسابه




بنت شيخ(ن) وسط ربعه له بين الرجال حساب
اليا ضاقت به الارياء ؛ يهز الارض مشعابه




ترى بدري على مثلك تعيب وساسه معياب
ياليت اللي يعيبني ؛؛ يحاول يستر ثيابه




انا لاجتني الزله ؛ من الجاهل وهو كذاب
تركت القافله تمشي ؛؛ وراها تنبح كلابه




وانا ليامن كشف ان الخوي اصبح لسانه داب
نزعت السم من عرقه وكسرت بمخلبي نابه




خلاص اليوم يافلان؛ كرهتك والقلوب غراب
وترى كل طير(ن) بكبد السماء يشبع مخلابه




خساره مثلك بقلبي تضمه غرفة الاحباب
وخساره غلطة العاشق ؛ يحطك اول احبابه




بعد هذا تبيني ارجع لاجل عينك نصير اصحاب
خسيت واقلب وجهك ؛ ولا كلمه ؛ ولاجابه